هالأكلة اسمها جدي بالزيت وما بصير تعمليها لا بغنم ولا بعجل ولا بدجاج، الجدي (ذكر الماعز ) ضروري جداً لهالأكلة بنعبي الطنجرة مي من الحنفية، وبنزل قطع اللحمة عليها على نار هادية بدون أي إضافات بس تفور المي وتطلع الزفرة، بنلمها وننظفها تماماً، وبنضيف المطيبات مثل البصلة والفلفل الأسود وكبش القرنفل بعد قلبتين تلاتة، بنسحب اللحمة لأننا ما بدنا إياها تستوي سلق كامل، هي هيك ثلث استواء بس، والمي اللي سلقنا فيها بنكبها.
بنجيب طنجرة تانية فاضية، بنحط فيها حوالي 3 كاسات زيت زيتون بلدي وبنتركه يحمى، وبنضيف 12 لـ 15 رأس ثوم.
بنزل لحم الجدي بالزيت السخن وبنحمسه لحتى ياخد لون بني قوي ومحمص من كل الجهات، وممكن نقلي اللحمة على مراحل عشان تتحمر بشكل ممتاز.
بعد ما تتقلى اللحمة، بنضيف فوقها مي سخنة عم تغلي وكيلو بطاطا مقشرة، وبنتركهم يغلوا مع بعض ونضيف السبع بهارات.
قبل ما تستوي الطبخة بربع ساعة أو نص ساعة، بنضيف 4 علب فطر مشان ما يذوبوا.
وبس تستوي اللحمة وتصير “نيفة” وتذوب لحالها، بنضيف الملح آخر شي مشان اللحمة ما تشد.
وبالنسبة للطبق الجانبي، بنفرم فاصوليا وجزر وبنقليها بزيت زيتون، وبنطبخهم بشوية مي، ولما يستووا بنضيف حبات الذرة والبازيلاء المعلبة وبنقلبهم مع رشة ملح وبهارات لتنشف ميتهم ويصيروا جاهزين للتقديم جنب الرز الأبيض.
المقادير:
لحم جدي مقطع.
زيت زيتون بلدي.
رؤوس ثوم (حسب كمية اللحم).
كيلو بطاطا.
4 علب فطر.
بهارات: سبع بهارات، فلفل أسود، كبش قرنفل.
للتقديم: رز أبيض، فاصوليا، جزر، ذرة، بازيلاء.
طريقة التحضير:
سلق اللحم سلقة خفيفة للتخلص من الزفرة مع المطيبات ثم تصفيته.
تحمير اللحم بالزيت الساخن مع الثوم حتى يأخذ لوناً بنياً.
إضافة المي السخنة والبطاطا وتركهم حتى ينضج اللحم والبطاطا.
إضافة الفطر والملح في المرحلة الأخيرة.
تحضير الخضار الجانبية بقلي الفاصوليا والجزر وإضافة الذرة والبازيلاء وتنشيف المي.
التقديم بجانب الرز الأبيض.
هيك صارت طبختنا جاهزة، اللحمة دايبة واللون طالع بجنن، جربوا هالطريقة وادعوا لنا، وكل عام وانتم بخير .